ಕೌನ್ಸಿಲ್ ಮಹತ್ವದ ತೀರ್ಮಾನ – ದೇಶದಲ್ಲಿ ಕೇವಲ ಎರಡು ಸ್ಲ್ಯಾಬ್ ತೆರಿಗೆ (5% ಮತ್ತು 18%) ಜಾರಿಯಲ್ಲಿ; ಸೆಪ್ಟೆಂಬರ್ 22ರಿಂದ ಜಾರಿಗೆ!”

 

ಭಾರತದ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ವ್ಯವಸ್ಥೆಯಲ್ಲಿ ಐತಿಹಾಸಿಕ ಬದಲಾವಣೆಗಳನ್ನು ಜಾರಿಗೆ ತರಲು ಬುಧವಾರ (ಸೆಪ್ಟೆಂಬರ್ 3, 2025) ನಡೆದ ಜಿಎಸ್ಟಿ ಕೌನ್ಸಿಲ್ ಸಭೆ ಪ್ರಮುಖ ನಿರ್ಧಾರಗಳನ್ನು ಕೈಗೊಂಡಿದೆ. ಈ ನಿರ್ಧಾರಗಳು ಜನಸಾಮಾನ್ಯರ ದೈನಂದಿನ ಖರ್ಚನ್ನು ಕಡಿಮೆ ಮಾಡುವುದರೊಂದಿಗೆ, ದೇಶೀಯ ಬಳಕೆ ಹೆಚ್ಚಿಸಲು ಮತ್ತು ಆರ್ಥಿಕತೆಗೆ ಉತ್ತೇಜನ ನೀಡುವ ಉದ್ದೇಶ ಹೊಂದಿವೆ.

ನಾಲ್ಕು ಸ್ಲಾಬ್‌ಗಳಿಂದ ಎರಡು ಸ್ಲಾಬ್‌ಗೆ ಸರಳೀಕರಣ

ಇದುವರೆಗೆ ಜಿಎಸ್ಟಿ ದರಗಳನ್ನು 5%, 12%, 18% ಮತ್ತು 28% ಎಂಬ ನಾಲ್ಕು ಹಂತಗಳಲ್ಲಿ ವಿಧಿಸಲಾಗುತ್ತಿತ್ತು. ಈಗ ಅದನ್ನು ಕೇವಲ ಎರಡು ಹಂತಗಳಿಗೆ ಕುಗ್ಗಿಸಲಾಗಿದೆ: 5% ಮತ್ತು 18%. ಜೊತೆಗೆ ಐಷಾರಾಮಿ ಮತ್ತು ಹಾನಿಕಾರಕ ವಸ್ತುಗಳಿಗಾಗಿ ವಿಶೇಷ 40% ತೆರಿಗೆ ಸ್ಲಾಬ್ನ್ನು ಜಾರಿಗೊಳಿಸಲಾಗಿದೆ. ಈ ಬದಲಾವಣೆಗಳು ಸೆಪ್ಟೆಂಬರ್ 22 ರಿಂದ ಜಾರಿಗೆ ಬರಲಿವೆ.

ದಿನನಿತ್ಯದ ಆಹಾರ ವಸ್ತುಗಳಿಗೆ ತೆರಿಗೆ ರಿಯಾಯಿತಿ

ಆಹಾರ ಪದಾರ್ಥಗಳು ಜನಜೀವನದ ಪ್ರಮುಖ ಅಂಗ. ಕೌನ್ಸಿಲ್ ಈ ಬಾರಿ ವಿಶೇಷ ಗಮನ ಹರಿಸಿದ್ದು, ಸಾಮಾನ್ಯ ಜನರಿಗೆ ನೇರ ಲಾಭವಾಗುವ ನಿರ್ಧಾರಗಳನ್ನು ಕೈಗೊಂಡಿದೆ.

ಶೂನ್ಯ ತೆರಿಗೆ (0%): ಪನೀರ್, ಎಲ್ಲಾ ಬಗೆಯ ರೊಟ್ಟಿ, ಚಪಾತಿ, ಪರೋಟ, ಅಲ್ಟ್ರಾ ಹೈ ಟೆಂಪರೇಚರ್ ಹಾಲು.

5% ತೆರಿಗೆ: ತುಪ್ಪ, ಬೆಣ್ಣೆ, ಕಾರ್ನ್‌ಫ್ಲೇಕ್ಸ್, ಪಾಸ್ತಾ, ಇನ್ಸ್ಟಂಟ್ ನೂಡಲ್ಸ್, ಕಾಫಿ, ಜಾಮ್, ಐಸ್ ಕ್ರೀಂ, ಬಿಸ್ಕೆಟ್, ಹಣ್ಣು ರಸ, ಹಾಲು ಪಾನೀಯಗಳು, ನಮ್‌ಕೀನ್ ಮತ್ತು ಸಕ್ಕರೆ ಸಿಹಿ ಪದಾರ್ಥಗಳು.

ಇವುಗಳ ಮೇಲೆ ಇದುವರೆಗೆ 12% ಅಥವಾ 18% ತೆರಿಗೆ ವಿಧಿಸಲಾಗುತ್ತಿತ್ತು. ಕಡಿತದಿಂದಾಗಿ ಮಾರುಕಟ್ಟೆಯಲ್ಲಿ ಬೆಲೆ ಕಡಿಮೆಯಾಗಲಿದೆ.

ಗೃಹೋಪಯೋಗಿ ಮತ್ತು ವೈಯಕ್ತಿಕ ಬಳಕೆಯ ವಸ್ತುಗಳು

ಸಾಮಾನ್ಯ ಮನೆಗಳಿಗೆ ಅಗತ್ಯವಿರುವ ಹಲವು ವಸ್ತುಗಳು ಈಗ ಅಗ್ಗವಾಗುತ್ತವೆ.

5% ತೆರಿಗೆ: ಶಾಂಪೂ, ಸಾಬೂನು, ಹಲ್ಲು ಪೇಸ್ಟ್, ಹಲ್ಲು ಬ್ರಶ್, ಹೇರಾಯಿಲ್, ಸೈಕಲ್, ಟೇಬಲ್, ಕುರ್ಚಿ, ಅಡುಗೆ ಸಾಮಾನು, ಕಂಬಿ, ಕನ್ನಡಿ, ಬಾಂಬೂ ಫರ್ನಿಚರ್.

ಇವುಗಳ ಮೇಲೆ ಹಿಂದಿನ 12–18% ತೆರಿಗೆ ಕಡಿತಗೊಂಡು ಕೇವಲ 5% ಆಗಿದೆ.

ಆರೋಗ್ಯ ಮತ್ತು ವಿಮೆ ಕ್ಷೇತ್ರಕ್ಕೆ ದೊಡ್ಡ ಉತ್ತೇಜನ

ಹಣಕಾಸು ಸಚಿವ ನಿರ್ಮಲಾ ಸೀತಾರಾಮನ್ ಅವರು ಘೋಷಿಸಿದಂತೆ, ವೈಯಕ್ತಿಕ ಆರೋಗ್ಯ ವಿಮೆ ಮತ್ತು ಜೀವನ ವಿಮೆ ಪಾಲಿಸಿಗಳು ಈಗಿನಿಂದ ತೆರಿಗೆ ಮುಕ್ತ. ಇದು ಸಾಮಾನ್ಯ ಕುಟುಂಬಗಳಿಗೆ ವಿಮೆ ಪಡೆಯುವ ವೆಚ್ಚವನ್ನು ಕಡಿಮೆಮಾಡಿ, ವಿಮೆ ವಿಸ್ತರಣೆಗೆ ನೆರವಾಗಲಿದೆ. ಜೊತೆಗೆ 33 ಜೀವ ರಕ್ಷಕ ಔಷಧಿಗಳು ಕೂಡ ತೆರಿಗೆ ಶೂನ್ಯವಾಗಿವೆ.

ನಿರ್ಮಾಣ ಮತ್ತು ಮೂಲಸೌಕರ್ಯ ಕ್ಷೇತ್ರ

ಸಿಮೆಂಟ್ ದರವನ್ನು 28%ರಿಂದ 18%ಕ್ಕೆ ಇಳಿಸಲಾಗಿದ್ದು, ಇದು ಮನೆ ನಿರ್ಮಾಣ ಮತ್ತು ಮೂಲಸೌಕರ್ಯ ಅಭಿವೃದ್ಧಿ ಯೋಜನೆಗಳಿಗೆ ದೊಡ್ಡ ಬೂಸ್ಟ್ ನೀಡಲಿದೆ. ಕಬ್ಬಿಣ ಮತ್ತು ಉಕ್ಕು ಉತ್ಪನ್ನಗಳಿಗೂ ದರ ಇಳಿಕೆ ಜಾರಿಗೆ ಬಂದಿದೆ.

ರಿಯಲ್ ಎಸ್ಟೇಟ್ ತಜ್ಞರ ಅಭಿಪ್ರಾಯದಲ್ಲಿ, ಇದು ‘ಹೌಸಿಂಗ್ ಫಾರ್ ಆಲ್’ ದೃಷ್ಟಿಕೋಣವನ್ನು ಸಾಕಾರಗೊಳಿಸಲು ಸಹಕಾರಿಯಾಗಲಿದೆ.

ವಾಹನ ಹಾಗೂ ಎಲೆಕ್ಟ್ರಾನಿಕ್ಸ್ ಕ್ಷೇತ್ರ

28%ರಿಂದ 18%ಕ್ಕೆ ಇಳಿಕೆ: ಚಿಕ್ಕ ಕಾರುಗಳು, 350cc ಒಳಗಿನ ಬೈಕ್‌ಗಳು, ಟ್ರಕ್, ಬಸ್, ತ್ರಿಚಕ್ರ ವಾಹನಗಳು, ಟಿವಿ (ಎಲ್ಲಾ ಗಾತ್ರ), ಏರ್‌ಕಂಡೀಷನರ್, ಡಿಶ್‌ವಾಷರ್.

ವಿದ್ಯುತ್ ವಾಹನಗಳು (EVs): ಮುಂದುವರೆಯುವಂತೆ ಕೇವಲ 5% ತೆರಿಗೆ.

ವಾಹನ ಉದ್ಯಮ ಇದರಿಂದ ದೊಡ್ಡ ಮಟ್ಟದಲ್ಲಿ ಉತ್ತೇಜನ ಪಡೆಯಲಿದ್ದು, ಕೆಲಸದ ಅವಕಾಶಗಳಿಗೂ ಬಾಗಿಲು ತೆರೆಯಲಿದೆ.

ಐಷಾರಾಮಿ ಮತ್ತು ಹಾನಿಕಾರಕ ವಸ್ತುಗಳಿಗೆ ಭಾರೀ ತೆರಿಗೆ

ಸಾಮಾನ್ಯ ಜನತೆಗೆ ರಿಯಾಯಿತಿ ನೀಡಿದ್ದರೂ, ಐಷಾರಾಮಿ ಮತ್ತು ಆರೋಗ್ಯ ಹಾನಿಕಾರಕ ವಸ್ತುಗಳಿಗೆ ಸರ್ಕಾರ ಕಠಿಣ ನಿಲುವು ತಾಳಿದೆ.

40% ತೆರಿಗೆ: ಪಾನ್ ಮಸಾಲಾ, ಗಟ್ಕಾ, ಸಿಗರೆಟ್, ತಂಬಾಕು ಉತ್ಪನ್ನಗಳು, ಸಕ್ಕರೆ ಮಿಶ್ರಿತ ಕಾರ್ಬೊನೇಟೆಡ್ ಪಾನೀಯಗಳು, ದೊಡ್ಡ ಕಾರುಗಳು, 350cc ಮೇಲ್ಪಟ್ಟ ಮೋಟಾರ್‌ಸೈಕಲ್‌ಗಳು, ಯಾಟ್, ಖಾಸಗಿ ವಿಮಾನಗಳು.

ತಜ್ಞರ ಅಭಿಪ್ರಾಯ

CII ಮಹಾನಿರ್ದೇಶಕ ಚಂದ್ರಜಿತ್ ಬ್ಯಾನರ್ಜಿ ಅವರು, “ಈ ಬದಲಾವಣೆಗಳು ಉದ್ಯಮಗಳಿಗೆ ಸ್ಪಷ್ಟತೆ ನೀಡುತ್ತವೆ, ಗ್ರಾಹಕರಿಗೆ ಬೆಲೆ ಇಳಿಕೆಯಿಂದ ತಕ್ಷಣದ ಲಾಭ ಒದಗಿಸುತ್ತವೆ” ಎಂದು ಹೇಳಿದ್ದಾರೆ.

ನಿರಂಜನ್ ಹಿರಾನಂದಾನಿ ಅವರು, “ಇದು ಗ್ರಾಹಕರ ಖರೀದಿ ಶಕ್ತಿ ಹೆಚ್ಚಿಸಿ ಆರ್ಥಿಕತೆಗೆ 8%ಕ್ಕೂ ಹೆಚ್ಚು ವೃದ್ಧಿ ತರಬಲ್ಲ ನಿರ್ಧಾರ” ಎಂದಿದ್ದಾರೆ.

ಮಹೀಂದ್ರಾ ಗ್ರೂಪ್ ಸಿಇಒ ಅನೀಶ್ ಶಾ ಅವರು, “ಈ ಬದಲಾವಣೆಗಳು ಭಾರತವನ್ನು ವಿಕಸಿತ ರಾಷ್ಟ್ರದತ್ತ ಕೊಂಡೊಯ್ಯುವ ಮಹತ್ವದ ಹೆಜ್ಜೆ” ಎಂದು ಹೇಳಿದರು.

ಹಣಕಾಸು ಸಚಿವರ ಸ್ಪಷ್ಟನೆ

ಸೀತಾರಾಮನ್ ಅವರು, “ಜಿಎಸ್ಟಿ ಒಂದು ಸ್ಥಿರ ವ್ಯವಸ್ಥೆಯಲ್ಲ. ತೆರಿಗೆ ದರ ಕಡಿಮೆಯಾಗಿದರೆ ಖರೀದಿ ಹೆಚ್ಚುತ್ತದೆ, ಆದಾಯವೂ ಹೆಚ್ಚುತ್ತದೆ. ಕೇಂದ್ರ ಮತ್ತು ರಾಜ್ಯಗಳು ಸಮಾನವಾಗಿ ಲಾಭ–ನಷ್ಟ ಹಂಚಿಕೊಳ್ಳುತ್ತವೆ” ಎಂದು ತಿಳಿಸಿದರು.

ಈ ಬಾರಿ ಜಿಎಸ್ಟಿ ಕೌನ್ಸಿಲ್ ತೆಗೆದುಕೊಂಡ ನಿರ್ಧಾರಗಳು ಸಾಮಾನ್ಯ ಗ್ರಾಹಕರಿಗೆ ಹಬ್ಬದ ಉಡುಗೊರೆ ಎಂಬಂತಿವೆ. ದಿನನಿತ್ಯದ ಅಗತ್ಯ ವಸ್ತುಗಳು ಅಗ್ಗವಾಗುತ್ತವೆ, ವಿಮೆ ಸುಲಭವಾಗುತ್ತದೆ, ಮನೆ ಕಟ್ಟುವ ವೆಚ್ಚ ಕಡಿಮೆಯಾಗುತ್ತದೆ. ಕೈಗಾರಿಕೆಗಳು ಕೂಡ ಹೊಸ ಉತ್ಸಾಹ ಪಡೆಯಲಿವೆ. ಒಟ್ಟಿನಲ್ಲಿ, ಈ ಬದಲಾವಣೆಗಳು ಆರ್ಥಿಕತೆಗೆ ಚೈತನ್ಯ ತುಂಬಿ, ‘ವಿಕಸಿತ ಭಾರತ 2047’ ದೃಷ್ಟಿಯತ್ತ ದೇಶವನ್ನು ಮುನ್ನಡೆಸಲಿವೆ.