ಇಂಡಿಗೊ ವಿಮಾನಯಾನದಲ್ಲಿ ಭಾರೀ ಅಸ್ತವ್ಯಸ್ತ: ಒಂದೇ ದಿನ 550 ವಿಮಾನಗಳ ಕಾರ್ಯಾಚರಣೆ ರದ್ದು!

 

ಕಳೆದ ಇಪ್ಪತ್ತು ವರ್ಷಗಳ ಕಾರ್ಯಾಚರಣೆ ದಾಖಲೆಯಲ್ಲಿಯೇ ಮೊದಲ ಬಾರಿಗೆ, ದೇಶದ ಪ್ರಮುಖ ವಿಮಾನಯಾನ ಸಂಸ್ಥೆಯಾದ ಇಂಡಿಗೊ (IndiGo) ಗುರುವಾರ ಒಂದೇ ದಿನ 550 ವಿಮಾನಗಳ ಕಾರ್ಯಾಚರಣೆಯನ್ನು ರದ್ದುಪಡಿಸುವ ಮೂಲಕ ಭಾರೀ ಅಸ್ತವ್ಯಸ್ತತೆಯನ್ನು ಎದುರಿಸಿದೆ. ಸಿಬ್ಬಂದಿ ಕೊರತೆ ಮತ್ತು ತಾಂತ್ರಿಕ ಸಮಸ್ಯೆಗಳಿಂದಾಗಿ ಈ ವಿಮಾನಗಳ ರದ್ದಾಗಿದೆ. ಪ್ರತಿದಿನ ಸರಾಸರಿ 2,300 ವಿಮಾನಗಳನ್ನು ನಿರ್ವಹಿಸುವ ಹೆಗ್ಗಳಿಕೆ ಹೊಂದಿರುವ ಇಂಡಿಗೊ, ತನ್ನ ಸೇವೆಯ ಸಮಯ ಪಾಲನೆಗಾಗಿ ಹೆಸರುವಾಸಿಯಾಗಿತ್ತು. ಆದರೆ, ಬುಧವಾರದಂದು ಈ ಸಕಾಲಿಕ ಸೇವೆ (On-Time Performance - OTP) ಕೇವಲ ಶೇಕಡ 19.7ಕ್ಕೆ ಕುಸಿದಿದೆ. ಮಂಗಳವಾರ ಈ ಪ್ರಮಾಣ ಶೇಕಡ 35 ರಷ್ಟಿತ್ತು. ಪರಿಸ್ಥಿತಿಯನ್ನು ಸಹಜ ಸ್ಥಿತಿಗೆ ತರಲು ಇಂಡಿಗೊ ಪೂರ್ವಯೋಜಿತ ಸೇವಾ ರದ್ದತಿಯ ಮೂಲಕ ಹರಸಾಹಸ ಪಡುತ್ತಿದೆ.

ಈ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ, ನಾಗರಿಕ ವಿಮಾನಯಾನ ಸಚಿವಾಲಯ (Ministry of Civil Aviation) ಮತ್ತು ಡಿಜಿಸಿಎ (DGCA) ಅಧಿಕಾರಿಗಳು ಇಂಡಿಗೊದ ಹಿರಿಯ ಅಧಿಕಾರಿಗಳನ್ನು ಭೇಟಿ ಮಾಡಿ ಚರ್ಚೆ ನಡೆಸಿದರು. ಕಾರ್ಯಾಚರಣೆಯನ್ನು ಸಹಜ ಸ್ಥಿತಿಗೆ ತರುವುದು ಮತ್ತು ಸಮಯಪಾಲನೆಯನ್ನು ಮತ್ತೆ ಜಾರಿಗೊಳಿಸುವುದು ಸುಲಭ ಸಾಧ್ಯವಲ್ಲ ಎಂದು ಸ್ವತಃ ಇಂಡಿಗೊದ ಸಿಇಓ ಪೀಟರ್ ಎಲ್ಟರ್ಸ್ (Pieter Elbers) ಒಪ್ಪಿಕೊಂಡಿದ್ದಾರೆ. ಮುಂಬರುವ ಎರಡು-ಮೂರು ದಿನಗಳಲ್ಲಿ ಮತ್ತಷ್ಟು ವಿಮಾನಗಳು ರದ್ದಾಗುವ ಸಾಧ್ಯತೆಯಿದೆ ಎಂದು ತಿಳಿದುಬಂದಿದೆ. ಮುಂಬೈ (118), ಬೆಂಗಳೂರು (100), ಹೈದರಾಬಾದ್ (75), ಕೋಲ್ಕತ್ತಾ (35), ಚೆನ್ನೈ (26) ಮತ್ತು ಗೋವಾ (11) ಸೇರಿದಂತೆ ಹಲವು ಪ್ರಮುಖ ವಿಮಾನ ನಿಲ್ದಾಣಗಳಲ್ಲಿ ಸೇವೆಗಳನ್ನು ರದ್ದುಪಡಿಸಲಾಗಿದೆ ಎಂದು ಪಿಟಿಐ ವರದಿ ಮಾಡಿದೆ.

ತನ್ನ ಸಿಬ್ಬಂದಿ ಅಗತ್ಯತೆಯ ಕುರಿತು ಹೊಸ ನಿಯಮಾವಳಿಗಳ ಅಡಿಯಲ್ಲಿ ತಪ್ಪು ಅಂದಾಜು ಮಾಡಿರುವುದಾಗಿ ಇಂಡಿಗೊ ಸಂಸ್ಥೆಯು ಒಪ್ಪಿಕೊಂಡಿದೆ. ಚಳಿಗಾಲದ ವಾತಾವರಣ ಮತ್ತು ವಿಮಾನ ನಿಲ್ದಾಣಗಳಲ್ಲಿನ ದಟ್ಟಣೆಯ ಕಾರಣದಿಂದಾಗಿ ಸಮರ್ಪಕ ಸಿಬ್ಬಂದಿ ಲಭ್ಯತೆ ಸಾಧ್ಯವಾಗುತ್ತಿಲ್ಲ ಎಂದು ಸಂಸ್ಥೆ ಸ್ಪಷ್ಟಪಡಿಸಿದೆ. ಈ ಬಿಕ್ಕಟ್ಟಿನಿಂದಾಗಿ ಸಾವಿರಾರು ಪ್ರಯಾಣಿಕರ ಪ್ರಯಾಣ ಯೋಜನೆಗಳು ಸಂಪೂರ್ಣವಾಗಿ ಅಸ್ತವ್ಯಸ್ತಗೊಂಡಿದ್ದು, ವಿಮಾನಯಾನ ಸಂಸ್ಥೆಯು ಶೀಘ್ರವಾಗಿ ಕಾರ್ಯಾಚರಣೆಯನ್ನು ಪುನಃಸ್ಥಾಪಿಸಲು ಪ್ರಯತ್ನಿಸುತ್ತಿದೆ.