ಈಡನ್ ಗಾರ್ಡನ್ಸ್‌ನಲ್ಲಿ ಟೀಮ್ ಇಂಡಿಯಾಕ್ಕೆ ಹೀನಾಯ ಸೋಲು

 

ಈಡನ್ ಗಾರ್ಡನ್ಸ್ ಮೈದಾನದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ತನ್ನ 93 ವರ್ಷಗಳ ಟೆಸ್ಟ್ ಇತಿಹಾಸದಲ್ಲೇ ಅತ್ಯಂತ ಹೀನಾಯ ಸೋಲು ಕಂಡಿದೆ. ಕೇವಲ 124 ರನ್‌ಗಳ ಸುಲಭ ಗುರಿಯನ್ನು ಬೆನ್ನತ್ತಿದ ಭಾರತ ತಂಡವು ಕೇವಲ 93 ರನ್‌ಗಳಿಗೆ ಆಲೌಟ್ ಆಗಿ, 30 ರನ್‌ಗಳ ಅಂತರದಲ್ಲಿ ಸೋಲೊಪ್ಪಿಕೊಂಡಿತು. ಮೊದಲು ಬ್ಯಾಟಿಂಗ್ ಮಾಡಿದ ಆಫ್ರಿಕಾ 159 ರನ್ ಕಲೆ ಹಾಕಿದರೆ, ಭಾರತವು ಪ್ರಥಮ ಇನ್ನಿಂಗ್ಸ್‌ನಲ್ಲಿ 189 ರನ್ ಗಳಿಸಿ 30 ರನ್‌ಗಳ ಮಹತ್ವದ ಮುನ್ನಡೆ ಸಾಧಿಸಿತ್ತು. ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ಆಫ್ರಿಕಾ ಕೇವಲ 153 ರನ್‌ಗಳಿಗೆ ಆಲೌಟ್ ಆದಾಗ, ತವರಿನಲ್ಲಿ ಸುಲಭ ಜಯ ಭಾರತದ ಪಾಲಾಗಲಿದೆ ಎಂದು ಎಲ್ಲರೂ ನಿರೀಕ್ಷಿಸಿದ್ದರು.

ಆದರೆ, ಭಾರತೀಯ ಕ್ರಿಕೆಟ್ ಅಭಿಮಾನಿಗಳ ನಿರೀಕ್ಷೆಯನ್ನು ಹುಸಿಗೊಳಿಸಿದ ಭಾರತೀಯ ಬ್ಯಾಟಿಂಗ್ ವಿಭಾಗವು, ಆರಂಭಿಕರಿಂದ ಹಿಡಿದು ಟೆಲ್‌ಎಂಡರ್‌ಗಳವರೆಗೆ ಕಳಪೆ ಬ್ಯಾಟಿಂಗ್ ಪ್ರದರ್ಶನ ನೀಡಿ ಸಂಪೂರ್ಣ ಕುಸಿತ ಕಂಡಿತು. ಯಾವುದೇ ಪ್ರಮುಖ ಆಟಗಾರನು ಕ್ರೀಸ್‌ನಲ್ಲಿ ನಿಲ್ಲುವ ಅಥವಾ ಒಂದು ಉತ್ತಮ ಜೊತೆಯಾಟವನ್ನು ಕಟ್ಟುವ ಪ್ರಯತ್ನ ಮಾಡದೇ ಹೋದದ್ದು ಈ ಸೋಲಿಗೆ ಮುಖ್ಯ ಕಾರಣವಾಯಿತು. ಪರಿಣಾಮವಾಗಿ, ಕೇವಲ 124 ರನ್‌ಗಳ ಗುರಿಯನ್ನು ಬೆನ್ನತ್ತಲಾಗದೆ ತಂಡವು 93 ರನ್‌ಗಳ ಸಣ್ಣ ಮೊತ್ತಕ್ಕೆ ಆಲೌಟ್ ಆಗಿ, ತನ್ನ ಟೆಸ್ಟ್ ಇತಿಹಾಸದಲ್ಲಿ ಒಂದು ಕರಾಳ ಅಧ್ಯಾಯವನ್ನು ಸೇರಿಸಿತು.

ಈ ಸೋಲಿನ ಮೂಲಕ ಒಂದು ನಾಚಿಕೆಗೇಡಿನ ದಾಖಲೆ ನಿರ್ಮಾಣವಾಗಿದೆ. ತವರಿನಲ್ಲಿ 130 ರನ್‌ಗಿಂತ ಕಡಿಮೆ ಗುರಿಯನ್ನು ಬೆನ್ನತ್ತಲಾಗದೆ ಭಾರತ ಸೋತಿರುವುದು ಇದೇ ಮೊದಲು. ಈ ಹಿಂದೆ 2024 ರಲ್ಲಿ ಮುಂಬೈನ ವಾಂಖೆಡೆ ಮೈದಾನದಲ್ಲಿ ನ್ಯೂಝಿಲೆಂಡ್ ವಿರುದ್ಧ 147 ರನ್‌ಗಳ ಗುರಿ ಬೆನ್ನತ್ತಿದಾಗ ಉಂಟಾಗಿದ್ದ ಸೋಲು ಹೀನಾಯವಾಗಿತ್ತು. ಆದರೆ ಈಡನ್ ಗಾರ್ಡನ್ಸ್‌ನಲ್ಲಿ ಕಂಡು ಬಂದ ಬ್ಯಾಟಿಂಗ್ ಕುಸಿತವು ಆ ಹಳೆಯ ದಾಖಲೆಗಿಂತಲೂ ಮೀರಿ ನಿಂತಿದೆ. ಈ ಸೋಲು ಭಾರತದ ಟೆಸ್ಟ್ ಕ್ರಿಕೆಟ್‌ನಲ್ಲಿ ಹೊಸ ಚರ್ಚೆಯನ್ನು ಹುಟ್ಟುಹಾಕಿದೆ.